நடிகர் விஜயின் ஜனநாயகன் படத்திற்கு உடனடியாக U/A சான்றிதழ் வழங்கனும். சென்னை ஐகோர்ட் அதிரடி தீர்ப்பு.!
ஜனநாயகன்
News Today Tamil
நடிகர் விஜய் நடிப்பில் உருவாகியுள்ள 'ஜனநாயகன்' திரைப்படத்திற்கு தணிக்கை சான்றிதழ் கோரிய வழக்கில், சென்னை உயர்நீதிமன்றம் தற்போது தீர்ப்பு வழங்கியுள்ளது.
இயக்குநர் எச்.வினோத் இயக்கத்தில், நடிகர் விஜய், பூஜா ஹெக்டே, மமிதா பைஜூ உள்ளிட்ட பலர் நடித்துள்ள திரைப்படம் 'ஜனநாயகன்'. கே.வி.என். நிறுவனம் தயாரித்துள்ள இப்படம் பொங்கல் பண்டிகையை முன்னிட்டு வரும் ஜனவரி 9-ம் தேதி உலகம் முழுவதும் 5,000-க்கும் மேற்பட்ட திரையரங்குகளில் வெளியாக இருந்த நிலையில் தணிக்கை சான்றிதழ் கிடைக்காததால் ஒத்திவைக்கப்பட்டது.
இப்படத்திற்கு தணிக்கை சான்றிதழ் கோரி கடந்த டிசம்பர் 18-ம் தேதி விண்ணப்பிக்கப்பட்டது. படத்தை பார்த்த தணிக்கை வாரியம், சில காட்சிகள் மற்றும் வசனங்களை நீக்க நிபந்தனை விதித்து 'யு/ஏ' சான்றிதழ் வழங்க ஒப்புக்கொண்டது. தயாரிப்பு தரப்பும் அந்த மாற்றங்களைச் செய்தது.
இந்நிலையில், படத்தில் மத உணர்வுகளை புண்படுத்தும் காட்சிகள் இருப்பதாக புகார் வந்ததைக் காரணம் காட்டி, படத்தை மறுஆய்வுக் குழுவிற்கு (Review Committee) மாற்றி தணிக்கை வாரியம் உத்தரவிட்டது. இதனை எதிர்த்து தயாரிப்பு நிறுவனம் சென்னை உயர்நீதிமன்றத்தில் அவசர மனுத் தாக்கல் செய்தது.
இந்த வழக்கு நீதிபதி பி.டி.ஆஷா முன்னிலையில் இன்று மீண்டும் விசாரணைக்கு வந்தது. அப்போது இருதரப்பு வாதங்களும் முன்வைக்கப்பட்டன:
தயாரிப்பு தரப்பு: "500 கோடி ரூபாய் செலவில் உருவான படம் இது. படம் இன்னும் வெளியாகாத நிலையில், அதில் என்ன காட்சிகள் இருக்கிறது என்று தெரியாமல் யாரோ கொடுத்த புகாரின் அடிப்படையில் சான்றிதழ் வழங்க மறுப்பது சட்டவிரோதமானது. ஏற்கனவே மண்டல அலுவலர் சான்றிதழ் வழங்க பரிந்துரைத்த பிறகு, தணிக்கை வாரியத் தலைவர் அதை மறுஆய்வுக்கு அனுப்ப அதிகாரம் இல்லை."
தணிக்கை வாரியம்: "படம் 500 கோடியாக இருந்தாலும், 1 கோடியாக இருந்தாலும் வாரியத்திற்கு ஒன்றுதான். மத உணர்வு தொடர்பான புகார்கள் வந்ததால் சட்டப்படி நடவடிக்கை எடுக்கப்பட்டுள்ளது. வெளியீட்டுத் தேதியைக் காரணம் காட்டி தணிக்கை வாரியத்தை யாரும் நிர்பந்திக்க முடியாது.
அனைத்து தரப்பு வாதங்களையும் கேட்ட நீதிபதி பி.டி.ஆஷா, தணிக்கை வாரியம் தரப்பில் பெறப்பட்ட புகார் மனுக்கள் உள்ளிட்ட ஆவணங்களை ஆய்வு செய்தார். இதையடுத்து, இந்த வழக்கின் முக்கியத்துவத்தைக் கருதி, இறுதித் தீர்ப்பை இன்று வழங்குவதாக அறிவித்திருந்தார். மேலும் அதன்படி தற்போது நடிகர் விஜயின் ஜனநாயகன் படத்திற்கு உடனடியாக U/A சான்றிதழ் வழங்க நீதிமன்றம் உத்தரவிட்டுள்ளது. மேலும் படத்தை மறு ஆய்வு அனுப்பிய சென்சார் போர்டு நடவடிக்கை ரத்து செய்யப்பட்டுள்ளது.
