ரூ 15 ஆயிரம் சம்பளம் வாங்கும் அரசு அலுவலருக்கு ரூ 30 கோடிக்கும் மேல் சொத்து, அதிர்ச்சியில் அதிகாரிகள். !

கர்நாடக மாநிலம் கொப்பல் மாவட்டத்தில் உள்ள கிராமப்புற உள்கட்டமைப்பு மேம்பாட்டு நிறுவனத்தில் எழுத்தராக பணிபுரிந்த கலக்கப்பா என்பவரின் வீட்டில் லோக் ஆயுக்தா அதிகாரிகள் நடத்திய சோதனையில் ரூ.30 கோடிக்கும் அதிகமான மதிப்புள்ள சொத்துக்கள் பறிமுதல் செய்யப்பட்டுள்ளன.

வெறும் ரூ.15,000 மாத சம்பளத்தில் பணிபுரிந்த ஒருவரிடம் இவ்வளவு சொத்துக்கள் இருந்தது பெரும் அதிர்ச்சியை ஏற்படுத்தியுள்ளது.

விசாரணையில், கலக்கப்பா பெயரிலும், அவரது குடும்பத்தினரின் பெயரிலும் பின்வரும் சொத்துக்கள் இருப்பது கண்டுபிடிக்கப்பட்டது:

24 குடியிருப்பு வீடுகள்

4 வீட்டு மனைகள்

40 ஏக்கர் விவசாய நிலம்

350 கிராம் தங்க நகைகள்

1.5 கிலோ வெள்ளிப் பொருட்கள்

4 வாகனங்கள் (2 கார்கள், 2 பைக்குகள்)

கலக்கப்பா என்பவர் முன்னாள் பொறியாளர் சின்சோல்கர் என்பவருடன் இணைந்து, உள்கட்டமைப்பு திட்டங்களுக்கான ஆவணங்களை போலியாக உருவாக்கி, ரூ.72 கோடிக்கும் அதிகமான அரசு நிதியை தவறாக பயன்படுத்தியதாக விசாரணையில் தெரியவந்துள்ளது. இருவரும் தற்போது தீவிர விசாரணைக்கு உட்படுத்தப்பட்டுள்ளதாகவும், விசாரணைக்கு பிறகு உரிய நடவடிக்கை எடுக்கப்படும் என்றும் அதிகாரிகள் தெரிவித்துள்ளனர்.

இந்தச் சம்பவம், அரசு பணிகளில் நடக்கும் ஊழலின் தீவிரத்தை காட்டுவதோடு, பொதுமக்களிடையே பெரும் பரபரப்பையும் ஏற்படுத்தியுள்ளது.